01 اسفند ۱۳۸۵

آذربايجان دموکرات فرقه سينين ناشر افکاری

بئشينجی دؤور      22-جی نومره

آذربایجان دموکرات فيرقه سینین حزب توده ایرانلا بیرلشمه سی و فعالیتی

ایرانین شاهلیق رژیمی بوتون اؤلکه نین استقلالی، اورادا ياشايان خلقلارینین منافعی و انقلابی مبارزه نین گوجلنمه سی علهینه داخلده ارتجاع چی قووه لری بیرلشدیرمکله خارجی امپریالیستلرله سازیشه گیریردی.

دنیانین انقلابی تجروبه سی گؤسترمیشدیرکی، هر بیر اؤلکه نین انقلابی قووه لری ارتجاع بیرلی يینه قارشی بیرلشملیدیر.

واختیله ایراندا باش وئرمیش مصدیق حرکاتی نین اؤلکه نین انقلابی قووه لریله بیرلی يی نین اولماماسی نتيجه سینده مغلوب اولموشدور. اونا گؤره ده بوتون ایراندا شاهلیق رژیمینه و بیرلشمیش ارتجاع قووه لری اوزرینده غلبه چالماق اوچون انقلابی قووه لرین بیرلشمه سی ضروریتی میدانا گلیردی.

بو بیرلیکدن قورخان شاهلیق رژیمی و داخلی ارتجاع بوتون ایرانین ایالت لرینده مترقی قووه لرین بیرگه تدبیرلر ، یغنجاقلار کئچیرمه سینه هر جور مانعه لر یارادیردیلار. شاهلیق رژیمی امپریالیست لرین " پارچالا آغالیق ائت " تاکتیکاسیندان استفاده ائدیردی. اونا گؤره ده ارتجاع نین زحمت کشلره قارشی حیاتا کئچیردی يی استثماری، ظلم و غارتلری آرادان قالدیرماق مقصديله اؤلکه نین انقلابی قووه لرین بیرلی يی ضروریتی میدانا گلمیشدیر. همین ضرورت نتیجه سینده آذربایجان دموکرات فيرقه سیله حزب توده ایرانین بیرلشمه سی و واحید جبهه دن شاهلیق رژیمینه قارشی مبارزه آپاریلماسی قارشیا دوروردو.

ائله بو سببدن١٩۵۴- جو ایلین دکابر آئیندا حزب توده ایرانین مرکزی کميته سینین کاتیبلی يی طرفیندن ايکی تشکيلاتين بيرلشمه سی حاقیندا آذربایجان دموکرات فيرقه سینین مرکزی کميته سینه مکتوب گؤندریلمیشدیر. همین مکتوب ایله علاقه دار هر یکی پارتیانین نماینده لری ١٩۵۵- جی ایلدن باشلایاراق ١٩٦٠- جی ایلین ایول آئینا قدر بیرلی يین یارانماسی حاقیندا ٣٠- يه قدر مشاوره و اجلاسلار کئچیرمیشدير. همین اجلاسلارین ایره لی سوردوکلری قرار و تکلیف لرین پارتیالارین رهبر اورقانلارینین تصدیق ائدیلمه سینه وئريلمه سی قرارا آلینمیشدیر.

      ١٩۵۵- جی ایل یانوارین ١٣-١٢ده آذربایجان دموکرات فيرقه سینین کئچيريلن گئنیش پلئنومودا ایره لی سرولن تکلیفلرین وحدت کنفرانسینا آپاریلماسی مسئله سینی تصدیق ائديلمیشدیر. پلئنوم ایراندا امپریالیزم و ارتجاع یا قارشی واحید جبهه و یاخود بیرلیک یارادیلماسینا طرفدار اولدوغونو بیلدیرمیشدیر. عین زماندا پلئنوم اؤز تکلیف لرینی ايره لی سورموشدور. همین تکلیف لرده دئیليردی: « آذربایجان دموکرات فيرقه سینین رهبرلی يی آلتیندا آذربایجان خالقی ٢١ آذر حرکاتی آدیله انقلاب ائتمیش، اؤزونون ملی حکومتی نی یاراتمیشدیر. آذربایجان ملی حکومتی آذربایجان دیلینی رسمی دؤلت دیلی اعلان ائتمیش، آذربایجان خالقی اوزه رینده اولان ملی ظلم آرادان قالدیرمیش، آذربایجان خالقینین منافع لرینه خدمت ائدن اصلاحاتلار آپاريلميشدير. آذربایجان خالقینین مدنیتینه، انکشافینا، اؤلکه نين آبادلیغینا فکر وئریلمیشدیر. خالق بو آزادلیغی الده ائتمک اوچون مینلرله انقلابچی اوغول و قیزلارینی قوربان وئرمیشدیر. خصوصیله آذربایجان دموکرات فيرقه سی نین بو فعالیتی، حیاتا کئچیردی يی دموکراتیک تدبیرلرین نفوذو ایراندا و آذربایجاندا بؤیوک ایزلر بوراخمیش و حرمت قازانمیشدیر. همین حرمت و نفوذ یاشاماقدادیر. اونا گؤره ده آذربایجان و کوردوستان دموکرات فيرقه لرينی  قورويوب ساخلاماق لازیمدیر. بونلارين گله جک مبارزيه، خلقی صفربر ائتمکده بؤیوک رولوللاری اولا بيلر. بو مسئله واحید حزبین مرامنامه و نظامنامه سینده قید اولونمالیدیر.

      آذربایجان دموکرات فيرقه سینین مرکزی کمیته سی ایراندا انقلابی مبارزه یه رهبرلیک ائتمک اوچون واحید بیر مرکزین یارادیلماسینا اؤز راضیلیغی نی وئرمیشدیر. همین راضلیق معلوماتیندا قید اولونوردو کی، واحید مرکزی یاراتماق اوچون اوچ پارتیانین ( آذربایجان دموکرات فيرقه سینین، کوردوستان دموکرات فيرقه سینین و حزب توده ایرانین ) نماینده لریندن عبارت « بیرگه حرکت کمیته سی» آدیله رهبرلیک ائده جک بیرمرکزین یارانماسینی مقصده اویغون حساب ائدیلير. هم آذربایجان و همده کوردوستان دموکرات فيرقه لر نین مرکزی کمیته لری نین ایره لی سوردوکلری لایحه لریله بیرلیکده یازیلان مکتوب ١٩۵۵- جی ایل مارت آئینین ١٨ – ده حزب توده ایرانین مرکزی کمیته نین کاتیب لی يينه گؤندریلمیشدیر. مکتوبو آذربایجان دموکرات فيرقه سینین مرکزی کمیته سینین صدری میر قاسیم چشم آذر امضاء ائتمیشدیر.

      ایراندا واحید جبهه نین و یاخود واحید بیر مرکزین یارانماسی مسئله سی آذربایجان دموکرات فيرقه سینین ١٩۵٧ – جی ایلین مارت آئینین ٢۵- ٢٢- ده کئچیریلن ايکينجی عمومی رئسپوبلیکا کنفرانسیندا دا مذاکره اولونموشدور. کنفرانسدا ایراندا مبارزه آپاران پارتیا و جمعیت  لرین  حرکت بیرلی يی نین یارانماسی اساس مسئله کیمی مذاکره اولونموشدور. کنفرانسا وئریلن حسابات معروضه سینده آذربایجان دموکرات فيرقه سی نین مرکزی کمیته سی ایراندا فعالیت ائدن مترقی تشکیلاتلارین واحید جبهه سی نین و حرکت بیرلی يی نین یارانماسینا طرفدار چیخمیشدیر. لاکن حزب توده ایرانین مرکزی کمیته سی نین کاتیب لی يی  نین گؤندردیک لری مکتوبدا، اونلار تکلیف  ائدیردیلر کی، ایراندا واحید بیرتشکیلات یارانسین، آذربایجان دموکرات فيرقه سی حزب توده ایرانین ایالتی نین بیر تشکیلاتی کیمی فعالیت ائتمه لیدیر.

کنفرانس نماینده لری حزب توده ایرانین مرکزی کمیته سی کاتیب لی يی نین گؤندردی يی مکتوبو مذاکره ائتدیکدن سونرا، آذربایجان خالقینین گله جک مبارزه  سینه رهبرلیک ائده جک یگانه سیاسی تشکیلات کیمی آذربایجان دموکرات فيرقه سینی قبول ائتمیشلر. عین زماندا ایراندا مترقی قووه لرین، خصوصیله حزب توده ایرانین، کوردوستان و آذربایجان دموکرات فيرقه لری نین واحید جبهه ده مبارزه آپارماسی اوچون تدبرلر گؤرولمه سینی ایره لی سورموشلر. عمومی رئسپوبلیکا کنفرانسینی ایراندا مترقی تشکیلاتلارین حرکت بیرلی يی ایده یاسینی ایره لی سورموش و بو حاقدا قرار قبول ائتمیشدیر. کنفرانسین قرارینی مهاجرتده فعالیت ائدن آذربایجان دموکرات فرقه سینین بوتون تشکیلاتلاری مذاکره ائتمیش و آلقیشلا میشلار.

بئله لیکله ١٩٦٠– جی ایلین آوقوست آئیندا باشلانان وحدت کنفرانسی بؤیوک موفقیتله کئچیرمیشدیر. وحدت کنفرانسی ایراندا فعالیت ائده جک واحید پارتیانین یارانماسینی اعلان ائتمکله، واحید پارتیانین مرامنامه و نظامنامه سینی تصدیق ائتمیشدیر. تصدیق اولونموش مرامنامه و نظامنامه آذربایجان و کوردوستان دموکرات فيرقه لری نین کئچمیش انقلابی خدمت و نفوذلارینی نظره آلاراق، اونلارین آدلاری و مرکزی کمیته لری ساخلانيلماقلا، مستقل فعالیت ائتمه لری نظرده توتولموشدور. مهاجرت شرایطی نظره آلیناراق آذربایجان دموکرات فيرقه سی وحدت کنفرانسیندا ۴۵ ایل کئچمیش اولسادا، مستقل صورتده ئوز فعالیتینی دوام ائتدیریرلر. یالنیز ١٩٧٩- جی ایلدن ١٩٨٣– جی ایله قدر اؤز فعلیت لرین وطنه کؤچورن حزب توده ایران و اونون آذربایجان تشکیلاتی، آذربایجان دموکرات فيرقه سی وطنده بیرگه فعالیت ائتمیشلر.

لاکن وطنده ١٩٨٣- جی ایلدن انقلابی قووه لره قارشی قانلی هجوملار باشلانمیش، منيلرله قوربانلار وئرن حزب توده ایرانِن بير سيرا رهبر و عضولری وطنی ترک ائدرک مهاجرت ائتمه يه مجبور اولموشلار. مهاجرتده مبارزه نی داوام ائتديرمک مقصدیله  ١٩٨۵– جی ایلده تشکيلاتلار افغانستاندا  "ملی کنفرانس" آدیلا گئنيش ييغينجاق کئچیرمیشلر. ملی کنفرانسدا حزب توده ایران، آذربایجان دموکرات فيرقه سی و کوردوستان دموکرات فيرقه سینین نماینده لری اشتراک ائتمیشلر.

کئچیریلن کنفرانس ایراندا فعالیت ائدن انقلابی قووه لرین بيرگه فعالیت ائتمه لرینی لازیمی سويه ده تشکیل ائده بیلمه میشدیر. خالق فدائیلری تشکیلاتی بو بیرلی يین یارانماسینا راضیلیغی تصدیق ائتمه میشلر. کئچیریلن ملی کنفرانسین بوتون سندلری آذربایجان دموکرات فيرقه سینین تشکیلاتلاریندا مذاکره اولونموش، اونون بوتون قرارلاری نین حیاتا کئچیریلمه سینده چالیشمیشلار.

دونیادا باش وئرمیش حادثه لر عموميتله سوسیالیست اؤلکه لرینین داغیلماسی ایله علاقه دار مهاجرتده فعالیت ائدن حزب توده ایران و آذربایجان دموکرات فيرقه سی آراسیندا اولان علاقه لرین گئنیشلنمه سینه منفی تاثیر براخمیشدیر. چونکی امپریالیزم و ارتجاع قووه لری حزب توده ايرانلا آذربايجان دموکرات فيرقه سی آراسينداعلاقه لرین گئنیشلنمه سینه امکان وئرمیرلر.

بوتون یوخاریدا قید اولونان فاکتلارلا علاقه دار اولاراق ١٩٩٠– جی ایلدن بو گونه قدر هر ایکی پارتیا (حزب توده ایران و آذربایجان دموکرات فيرقه سی) آیریجا و مستقل صورتده اؤز فعالیت لرینی داوام ائتديريرلر. بعضی نشریه لرین و تصادفی مکتوبلارین گؤندریلمه سی اولسادا،  اونلارين آراسيندا تشکیلاتی، ایدیالوژی و سایره ساحه لرده و مهاجرتده آپاریلان ایشلر ایله باغلی هچ بیر علاقه یوخدور.

بئله کی، آذربایجان دموکرات فيرقه سی نین ١٩٩٠– جی ایلین اوکتیابر آئیندا کئچیریلن ٩- جو عمومی رئسپوبلیکا کنفرانسی فيرقه نین مستقیل فعالیت ائتمه سی نی ایره لی سورموشدور. ائله جه ده آذربایجان دموکرات فيرقه سی ١٩٩٦- جی ایلده مستقیل فعالیت ائتمه سیله علاقه دار قارشیسیندا دوران وظیفه لر ایله علاقه دار پلاتفورماسینی ( خط حرکتینی) ایره لی سورموشدور.

      قئید ائتمک لازیمدیر کی، حاضرکی شرایطده امپریالیزمین و ارتجاع نین انقلابی قووه لره قارشی آپاردیغی تجاوزکارلیق، اشغالچیلیق و مستملکه چیلیک سیاستي نه قارشی مبارزه نی گوجلندیرمک لازیمدیر. بونون اوچون اؤلکه ده فعالیت ائدن بوتون انقلابی ومترقی قووه لرین واحید جبهه ده بیرلشمه لری ضروری دیر.

اردبیلی لطفعلی ( فلکی)