|
خبـرلـر |
|
_____________________________________ 12.12.2006 آذربایجان اؤیرنجی حرکاتینین 21 آذر ایل دؤنومو موناسیبتیله بیانیه سی. 21 آذرین 61-ینجی ایل دؤنومون قوتلاساق دا حالا آذربایجانیمیزین دردلری ساغالماییب. دونیانین سورعتله ایره لی لمه سینه باخمایاراق 21-اینجی یوز ایلده ان ایلکین حاقلاریمیزی بئله الده ائده بیلمه میشیک. دؤنه- دونه آذربایجانلیلارین ایران آدلانان اؤلکه نین اولایلاریندا اؤنجول اولماقلارینا باخمایاراق اؤز میللی وارلیقلارینا آرخالانمامالارینا گؤره یئنیلمکلرینه شاهید اولموشوق. 1324-نجو ایلین آذر آییندان 1325-نجی ایلین آذرآیینا دک سوره ن میللی حکومت ، آذربایجانین معاصیر تاریخینین ان شیرین و عئینی حالدا ان آجی خاطیره و اولایی کیمی دیه رلنیر. سید جعفر پیشه وری آتامیزین قوردوغو میللی حکومتین نئجه یارانماسی و سونرا ایسه نئجه آرادان قالدیریلماسیندان ان قیمت لی تجروبه کیمی یارارلانیب ، میللی وارلیقلاریمیزی الده ائتمه لی ییک. خورداد اولای لاری و کوتله آراسیندا گئدن اویانیش و دیرنیش، میلی حرکتیمیزین یئنی بیر فازا داخیل اولماسینی گؤستریب، بو آشامادا میلی حرکت چالیشقانلارینین مسئولییت و گؤره و لرینین نه قدر آغیر و حساس اولدوغونو بیلدیریر. بوگونکو دورومدا حرکتین گرکلرین سئزیب ، اونلاری گئرچکلشدیرمه یه چالیشمالی یییق. همن بو گرک لردن ان اؤنملی سی حرکت ده چالیشان و موباریزه آپاران چئشیتلی قروپلار ، پارتیالار، تشکیلات لار و چالیشقانلار آراسیندا بیرلیک و اورتاقلیق یارانماسی و ایش بیرلیک آپارماق دیر. 21 آذر و میلی حکومت تجروبه سین دوشوندوکده ، آیدینجاسینا گؤرونور کی فارس فاشیزمی هئچ زامان بیزیم حاقلاریمیزی قبول ائتمه ییب ، ائتمه یه جک دیر. نئجه کی 10 لار وطن داشیمیز شهید اولارکن، یوزلر نفر ایشکنجه اولوب دوستاقلاردا حبس اولارکن، بوتون اؤیرنجی سل درگی لر و درنک لر قاپالی اولارکن، "ایران" قزئتینین یئنی دن یاییلماسی، حالا بونو ثبوت ائتمکده دیر. بو اساسی نظرده آلاراق اؤیرنجی لرین، خورداد اولای لاریندان بری بیلیم یوردلاردا یارانان باسقی لار، تضییق لر، تهدیدلر و بیر سوزله بوغونتولو آتمسفرین قارشیسیندا دایانماقلارین اوموروق. بونا اینانیریق کی بیزیم بیر آددیم گئری گؤتورمه ییمیزله دوشمن نئچه آددیم ایره لی له یه جک. سونوندا آذربایجان اؤیرنجی حرکاتی اولاراق ، اؤیرنجی میللت چیلری حرکتین اساس دیرک لریندن بیلیب، عزیز اؤیرنجی سیلاحداشلاریمیزی گونو-گوندن دایانیشلی و دیره نیشلی اولماغا چاغیریریق. یاشاسین آذربایجان یاشاسین آذربایجان میللی حرکاتی یاشاسین اؤیرنجی حرکاتی |
12.12.2006 ٢١ آذر حرکاتینین ایل دونومی موناسبتیله. پیشهوری یازیر: ايجتماعی مسالهلرین حل اولونماسینین ان یاخشی یولی، شوبههسیز کی، سببلری تاپیب اونلاری تحلیل ائتمکدن عيبارتدیر. مساله،هم ده سببلری تاپیب تحلیل ائتمکله قورتارمیر. جمعیت دائما دگیشیر و عوض اولور. زمان و مکان ايجتيماعی مساله لرده اينسانی گیجلددن بؤیوک بیر بلادیر. ايجتيماعی مسالهلری تدقیق ائدن بیرآدام لابدا تاریخین تکامول و سیچرایشینی، زمان و مکانین مؤوجود شرايطینی و اونلارین تاثیرلرینی نظره آلمالیدیر.
آذربایجان دموکرات فيرقه سینین موسيسلری ده، شرایطی نظره آلاراق فيرقهنی قوردولار وائله جه ده ميلی حؤکومتی یاراتدیلار!
آذربايجان خالقی تمام معناسی ايله بير ميلت کيمی آياغا قالخيب اؤز طبيعی و قانونی حاقينا، ماليک اولماق ايستهدی.
هر بير ميلتين اؤز موقدراتينا حاکيم اولماسی اوزامان مومکون اولا بيلر کی، او ميلت ياشاديغی اولکه نی ايداره ائتمک اوچون اساسی قانونلارا ماليک اولا بيلسين.
ایندی ده آذربایجانین وایران تورکلرینین سیاسی فعالاری وتشکیلاتلاری گرگ فيرقه نین وميلی حؤکومتین پارلاق عنعنه وسونتلرین گؤز اؤنونده توتاراق، اونون باشاريلارین هميده چاتیشمامازلیقلارین ونوقصان لارین دریندن اؤيرنهرک ، بوگونگو وضعیتی و مؤوجود شرایطی نظرده آلماقلا آذربایجان خلقینین وایران تورکلرینین قورتولوش ساواشینی سرانجاما چاتدیرسینلار!
فيرقه نین پارلاق سونتلری نه دئمک دیر:
١)- ٢١ آذر حرکاتی و ميلی حؤکومت دیکتاتورلوغا ، ظولمه ،عدالت سیزلیگه و شاهليق قورولوشونا قارشی ايدی.
٢)-٢١ آذر حرکاتی و ميلی حؤکومت آذربایجان اوچون دموکراتیک فدرالیسم وایران اوچون دموکراسی ایستهيیردی.
٣)-٢١ آذر حرکاتی و ميلی حؤکومت سؤز آزادليغينی، ويجدان آزادليغينی، مطبوعات آزادليغينی، توپلانتی و تشکيلاتلانما آزادليغينی، فردی آزادليقلارين تامين ائديلمه سينی اينسانليق و يورتداشليق حقوقونون توخونولماز اساسلاريندان سايير و اونون يولوندا موبارزه ائديردی.
٤)- ٢١ آذر حرکاتی و ميلی حؤکومت جيدی صورتده قادینلارین حوقوقوندان مودافيعه ائدیب و ایران تاریخینده بیرینجی دفعه اولاراق، ميلی حؤکومت دؤرونده، قادینلار سئچیب وسئچیلمه حقینه ماليک اولدولار. حتی آذربایجان نومایندهلرينين ایران دؤولتی ایله موذاکيره لرينده انتخابات قانونو لایحهسی ایله علاقهدار قادینلارین سئچیب وسئچیلمه حقینی مرکزی دؤولته تحمیل ائتديلر.
۵)٢١ آذر حرکاتی و ميلی حؤکومت تورک ديلينی آذربایجاندا رسمی دؤولت دیلی اعلان ائديب و اونون اینکشافینا هر طرفلی ایمکان یاراتدی.
٦)٢١آذر حرکاتی و ميلی حؤکومت ایراندا یاشایان خالقلارلا دوستلوق وامکداشليغا یول آچدی. او جمله دن تورک میلتی وکورد میلتی آراسیندا دوستلوق وصمیمی همکارلیق قراردادی باغلاندی.
٧)٢١آذر حرکاتی و ميلی حؤکومت گئری قالمیش فئودال وارباب رعییت موناسبتلرینه آذربایجاندا سون قویدی و زحمت آداملارینین یاشایيشلارینی یاخشیلاشدیرماق اوچون بؤیوک آدديملار آتدی.
ایندی ده بو عومومی پرنسیپلر اوز قووهتینده دورور. ٢١ آذر حرکاتی و ميلی حؤکومتين اينقيلابی و اينسانی سونتلرينه وفالی اولان هر بير آذربايجانلی، تورک ميلتینين و آذربايجان خالقینين باشیاوجاليغين ايستهينلر ايندی ده گرک:
جمهوری ايسلامینین آرادان قالدیريلماسيندان و ایراندا لائیک ودموکراتیک فدرالیزم سیستمینین قورولماقیندان مودافيعه ائتمهليدير!
فمینیزمدن وقادینلارلا کیشیلرین تام حقوق برابرلیگیندن سؤزسوز مودافيعه ائتمهليدير!
ایشچيلرين و زحمت آداملارینین ایستکلریندن واونلارین آزادجاسينا و موستقيل اولاراق سیندیکا قورمالاریندان دايانمادان مودافيعه ائتمهليدير!
تورک دیلینين تورکلر یاشایان بولگه لرده رسمی وقانونی دیل اولماسيندان مودافيعه ائتمهليدير!
ایراندا یاشایان باشقا میلتلرله دوستلوق وامکداشلیقدان مودافيعه ائتمهليدير!
هئچ بیر ساغلام تشکیلات وجمعیت کی اوزون ٢١ آذر حرکاتینین سونتلرینه واونون عمومی پرنسیپلرینه وفادار بیلیر، ايسلام جومهوريتینين هئچ بير جيناحينا اويماماليدير!
آذربایجان فدرال ـ دموکرات حرکاتینین ايجرايیه هئیاتی، آذر 1385
25. 05. 2006، ايران آمريکا ايله بيرباشا دانيشيقلاری ايسته ييب. واشينقتون پوست قزئتی نين يازديغينا گؤره ايران، آمريکا ايله دانيشيقلاری واسيطه چی يولو ايله آپاريلماسينی ايسته ييب. قزئت علاوه ائديب کی، بئله ايستک احمدی نيژادين جورج بوشا يازديغی 08 مای تاريخلی مکتوبوندان نتيجه لنن ايستکدير. قزئت يايديغی خبرين داواميندا بيلديريب: "ايرانين يوکسک وظيفه لی شخصلری واسيطه چيلرين الی ايله تهرانين آمريکا ايله بيرباشا دانيشيقلارين آپاريلماسينا حاضير اولدوغونو بيلديرن مئساژين واشينقتونا تقديم اولونماسينی ايسته ييبلر". قزئتين بيلديرديينه گؤره یو واسيطه چيلرين آدلاری ايچينده بين الخالق نووه آگئنتلييی نين باش ديرکتورو ماحمود البرداعی نين آدی گؤرونور. البرداعی ايکينجی گوندن (سه شنبه) بری کاندوليزا رايس و کوفی عنانلا دانيشيق اوچون واشينقتوندا دير. آمريکا تهلوکه سيزليک آگئنتليی نين اکسپئرتلری احمدی نيژادين مکتوبونو واشينقتون اوچون عالی بير ايمکان حسابلامالارينا باخماياراق بوش دؤولتی نين عضولری اونو رد ائديب و مکتوبو بير تاکتيکی داورانيش کيمی دييرلنديريبلر.
25. 05. 2006، گونئی آذربايجانليلارين اعتراض نومايشلرينده 60 نفر حبسه آلينيب. انتظام قووه لری نين کومانديری اسماييل احمدی مقدم بو خبری تهرانين فجر آدلی کولتورل-ايدمان تدبيرلری کومپلئکسينده کئچيريلميش "پوليسين بسيج ايله امکداشليغی" توپلانتيسيندا بيلديريب. مقدم علاوه ائديب کی، رسپوبليکادان مودافيعه ائتمک کئچميشله موقايسه ده داها دا اؤنم داشيير و حال حاضيردا رسپوبليکانين تهلوکه سيزلييی نين يوکسلديلمه سی و تهلوکه سيزليک امثالی نين آرتيريلماسی انتظام قووه لری نين اساس مقصدلريندن بيريدير. مقدم آذربايجان تورکلرينه قارشی (ايستر گونئی آذربايجان ايسترسه ده قوزئی آذربايجان) تحقير ائديجی کاريکاتورايا دايير بير ژورناليستين سورغوسونا جاواب اولاراق بيلديريب: "ايران قزئتی طرفيندن يايلميش بو کاريکاتورانی بيلمه مزليک حسابينا يازماق اولماز. اونا گؤره کی، بو کاريکاتورا قصد و مقصدله دولودور. رسپوبليکا پروکرورو کاريکاتورانی نشر ائتمکده الی اولان شخصلرين حبسه آلينماسی امرينی وئريب و انتظام قووه لری ده بو يؤنده لازيمی تدبيرلری گؤروب". اونون دئديينه گؤره بو حادثه لرده هئچ بير شخص اؤلمه ييب.