|
آذربايجـان دموکـرات فـرقـه سينين برنامه سی |
|
ايران چوخ ملتلی اولکه دير. بورادا قديم زامانلاردان تورکلر، کوردلر، فارسلار، عربلر، بلوچلار و ديگر خالقلار مسکونلاشميش، عصرلر بويو بيرگه ياشاميش، مشترک مدنيت ياراتميش، اشغالچيلارا قارشی واحد جبهه ده ووروشموشلار. انگليس استعماری کی اولکه نی اسارتده ساخلاماقا جان آتيردی، ۱٩- جی عصرين سونوندان باشلايان حرکاتلاری او جمله دن تنبکی، مشروطه، خيابانی، جنگل و خراسان حرکاتلاری دئوريلديکدن سونرا، روسيه ايرانين سياسی صحنه سيندن چيخدی و ايران تام انگليس امپرياليزميندن آسيلی وضعيته دوشدو. اولکه يه قانلی ديکتاتورا حاکيم اولوندو. ايکينجی دونيا محاربه سيندن سونرا آزادليق اوغروندا مبارزه اوچون الوئريشلی شرايط ياراندی و حرکات يئنی مرحله يه قدم قويدو. ملی آزادليق حرکاتی تاريخينده ملی مسئله اون پلانا چکيلدی. آذربايجان و کوردستان، ايران داخلينده ملی مختاريته نائل اولدولار. لاکين بو حرکاتلار اولکه مقياسلی حرکاتا چئوريله بيلمه دی و امپرياليست و مرتجع قوه لرين الی ايله بوغولدو. آذربايجان و کوردستان حرکاتلارينين قدارليقجا ياتيريلماسی بير داها گوستردی کی ملی مسئله نين حلی، ايرانين دموکراتيکلشمه سی ايله باغليدير. مرکزلشميش مستبد رژيم آيری - آيری منطقه لرده باشلايان، بيری ديگری ايله علاقه سی اولمايان ملی حرکاتلاری آسانليقلا بوغور، دموکراتيک پراسئسلری آسانليقلا دايانديرير و اونو ايللـرله گـئرييه آتـير. آذربايجـان خـالقـينين ۲۱ آذر حرکاتی (۱۳۲٤ - ۱۳۲۵) سون يوز ايلده ايراندا باش وئرن آلتی بويوک حرکات داخلينده، او جمله دن نفتين ملی لشديريلمه سی و۱۳۵٧- جی ايل انقلابی سيراسيندا اوزونه مخصوص يئر توتموش، آذربايجان خالقينين ملی انتباهينين يوکسلمه سينه نائل اولموش، همين حرکاتلار بوغولدوقدان سونرا دا بو يا باشقا شکيلده داوام ائتميش، ۵٧ - جی ايل انقلابيندان سونرا کوردستاندا سيلاحلی چيخيش، آذربايجاندا ايسه مدنی پروسئس شکلی آلميشدير۰ کئچميش سووئت اتفاقی اراضی سينده، او جمله دن شمالی آذربايجاندا (آذربايجان جمهوريتی) ملی دولتلرين يارانماسی، ملی مسئله نين انکيشافينا مثبت تاثيری اولميشدير. بونونلا علاقه دار قيد ائتمک لازم دير کی چوخ ملتلی ايراندا، تاريخی، اجتماعی و مدنی عامللرين قارشيليقلی تاثيری نتيجه سينده بورادا ياشايان خالقلارين ايران چرچيوه سينده ملی مختاريتلرينين تامين ائديلمه سی ضرورت کسب ائدير. ائله بونا گوره ده آذربايجـان دموکـرات فـرقـه سی اوز ايلکين هدفلرينه (۱۲ شهريور بيانيه سی) صادق قالير، فـرقـه نين بيرنجی قورولتايندا تصديق ائديلميش مرامنامه سينين اساس مدعالارينين - آذربايجان ملی مختاريتينين تامين ائديلمه سی ضرورتی - گونده ليکده اولماقينی نظره آلاراق، ايراندا ياشايان بوتون خالقلارين طبيعی حقوقو اولان «اوز مقدراتينی تعيين ائتمک» حاقينی، قانونی طلب حساب ائدير، زامانين شرايطينه اويغون اولاراق اوز يئنی مرامنامه سينی اعلان ائدير؛ اصل ۱- آذربايجـان دموکـرات فـرقـه سی ايرانين اراضی بوتولويونو و اونون مستقل ليينی مدافعه ائدير۰ اصل ۲- آذربايجانين ملی خصوصيتلرينی نظره آلاراق، آذربايجانا گئنيش مختاريت وئريلمه سينی طلب ائدير۰ اصل ۳- عمومی، گيزلی و بيرباشا سئچکی يولو ايله آذربايجان ملی مجلسی، ولايت، شهر، بولگه و کند انجمنلری تشکيل ائديلير۰ اصل ٤- ملی مجلس، خودمختار آذربايجانين خودمختار دولتينی تعيين ائدير۰ اصل ۵- آذربايجان (تورکجه سی) ديلی، آذربايجاندا دولت ديلی اعلان ائديلير. فارس ديلی ايسه بوتون اولکه بويو ملتلر آراسی علاقه ديلی کيمی قبول ائديلير۰ اصل ۶- آذربايجاندا مسکونلاشان خالقلار، ملتيندن، دينی عقيده سيندن و سياسی باخيشيندان آسيلی اولماياراق، برابر حقوقلو وطنداش کيمی سئچيب - سئچيلمک، آذربايجانين اداره ائديلمه سينده اشتراک ائتمک، اوز آنا ديللرينده اوخويوب - يازماق، اوز مدنيتلرينی انکيشاف ائتديرمک حقوقونا ماليک اولورلار۰ اصل ٧- انسان حقوقلارينين مدعالارينا اويغون اولاراق، سياسی و اجتماعی تشکيلاتلارين فعاليت آزادليغی، يغينجاق، سوز و مطبوعات آزادليغی تامين ائديلير۰ اصل ۸- اولکه اقتصادياتی خصوصی، کوپئراتيو (تعاونی) و دولت فورماسيندا اساسلانير، اقتصادياتين ثمرلی انکيشافی اوچون دولت تنظيم ائديجی رول اوينايير۰ اصل ٩- يئرلی شرايطه اويغون اولاراق، اقتصادياتين هر طرفلی انکيشافينا، صنايع و کند تصروفاتيندا تکنولوژينين گئنيش تطبيقينه دقت آرتيريلير۰ اصل ۱۰- بوتون ايران مقياسلی علاقه لرين داها دا گئنيشلنمه سينه سعی گوستريلير۰ اصل ۱۱- مدنيت و معارفين انکيشافی دقت مرکزينده اولور. ابتدايی مکتبلردن باشلاياراق عالی مکتبلره دک، درسلر آنا ديلينده آپاريلير، شهر و کندلرده مکتب شبکه لری گئنيشلنير، تحصيل اوچون کفايت قدر دولت وسائطی آيريلير. اقتصادی کادر پلانی اون پلانا چکيلير۰ اصل ۱۲- حياتين بوتون ساحه لرينده حقيقی ترقی يه نائل اولماق اوچون بوتون صينيف، طبقه و زومره لرين فطری و اينتلکتوال (هوشی) قوه سيندن ثمرلی استفاده ائديلمه سی استقامتينده جدی تدبيرلر گورولور۰ اصل ۱۳- شهرلرده و کندلرده علم و مدنيت اوجاقلاری گئنيشلنديريلير، کتابخانالار آچيلير، اينجه صنعتين (هنر) انکيشافينا شرايط ياراديلير، ملی تئاتر و ملی موسيقی انکيشاف ائتديريلير۰ اصل ۱٤- اهالينين ساغلامليغينا جدی دقت و فکر وئريلير، اطراف محيطين ساغلاملاشديريلماسی، طبيعتين قورونماسی دولت برنامه سينه داخل ائديلير. کندلرده طب منطقه لری (درمانگاه)، شهرلرده و بولگه مرکزينده خسته خانالار (بيمارستان) آچيلير، معالجه پولسوز آپاريلير۰ اصل ۱۵- آذربايجـان دموکـرات فـرقـه سی، شمالی آذربايجاندا مستقل دولتين يارانماسينی، آذربايجان خالقينين تاريخی غلبه سی حساب ائدير، اونون محکملنمه سی و انکيشافينی آرزولايير۰ اصل ۱۶- آذربايجـان دموکـرات فـرقـه سی، آذربايجان جمهوريتی ايله ايران آراسيندا اقتصادی و مدنی علاقه لرين گئنيشلنمه سينی هر ايکی اولکه خالقلارينين منافعينه اويغون علاقه کيمی قيمتلنديرير۰ تاريخ بويو مشترک مدنيته و مشترک منافعيه ماليک اولان ايران خالقلاری تام کونوللوک اساسيندا عموم خالق سورغوسو (رفراندم) يولو ايله اوز مقدراتينی تعيين ائدير. آذربايجان، ايراندا دموکراتيک جمعيت قورماق اوغروندا گئدن مبارزه نين اون سراسيندا گئدير۰
|