|
ه«۲۸ مای» آذربايجان خالقينين ملی بايرامی دير |
|
ه«۲۸ مای» ۱٩۱۸- جی ايل آذربايجان دموکراتيک جمهوريتينين يارانديغی گوندور. بوگون آذربايجان خالقی اوز مقدراتينی تعيين ائتمک حقوقوندان استفاده ائتدی. آذربايجان ملی دموکراتيک حکومتی ياراندی. آذربايجان دموکراتيک جمهوريتينين يارانماسی ائله بير تاريخی دؤوره تصادف ائتدی کی بوتون دونيانی محاربه آلؤو بوروموشدی. او زامان قافقاز دونيانين بويوک دولتلرينين دقت مرکزينده ايدی٠ آذربايجان دموکراتيک جمهوريتی تکجه داخلی پروبلملر ايله قارشی قارشييا دورماميشدی. او همده قافقازا گوز تيکن دولتلرله اوزلشميشدی. بئله بير زاماندا آذربايجان دموکراتيک جمهوريتی عثمانلی دولتينه مراجعه ائتدی و اوندان کومک ايسته دی. تيفليس ده فـورمالاشان ملی شورا گنجه يه کـوچدو. گنجه موقتی اولاراق ملی جمهوريتين مـرکـزی اولدو٠ ارمنی داشناکلارينا قارشی وؤروشان تورک اردوسو، باکی يا داخل اولدو و ارمنیلرين، تورک - مسلمان سوی قيريمينين قارشی سی آليندی. آذربايجان دموکراتيک جمهوريتينين مرکزی گنجه دن باکی يا کوچدو٠ آذربايجاندا ياشايان بوتون خالقلارين نماينده لريندن عبارت پارلامنت ايشه باشلادی. فتحعلی خان خويسکی نين (خويلينين) باشچيليغی آلتيندا ملی حکومت، پارلامنتين تصديقيندن کئچدی. آذربايجان ملی اردوسو ياراندی. آذربايجان اوز ملی سووئرنليينی محکملتمه يه باشلادی. قونشو اولکه لرله ديپلماتيک علاقه ياراندی. آذربايجان دموکراتيک جمهوريتينين نماينده لری دونيا محاربه قورتارديقدان سونرا تشکيل ائديلن صلح کنفرانسيندا اشتراک ائتديلر٠ محاربه ده مغلوب اولان عثمانلی تورک اردوسو، آذربايجانی ترک ائتدی. بيرينجی دونيا محاربه سينين سون ايللرينده ايرانی اشغال ائدن انگليس اردوسو باکی يا گلدی. عينی حالدا روسيادا يئنی يارانميش حکومت، چار روسياسينين حکمرانليغی آلتيندا اولان خالقلارا اوز مقدراتينی تعيين ائتمک حقوقی وئردی. لهستان، فنلاند، لتونی، ليتوانی و استونی نين استقلاليتينی رسميته تانيدی. لاکين او قافقازا خصوصی ايله باکی نفتينه گوز يوممادی و قافقازا قوشون يئريتدی. ۱۱- جی قيزيل اردو باکی يا داخل اولدو و آذربايجان دموکراتيک جمهوريتی دئوريلدی٠ بونونلا آذربايجانين ملی استقلاليتی آرادان گئتسه ده، استقلاليتی يئنی دن الده ائتمک اميدی آرادان گئتمه دی. آذربايجان دموکراتيک جمهوريتينين بانی سی محمدامين رسول زاده نين ده دييی کيمی؛ بير کره يوکسه لن بايراق بير داها ائنمز شعاری ملی مختاريت شکلينده تظاهر ائتدی٠ آذربايجان خالقی سووئتلر بيرليينين ترکيبی ده اولان مدتده اوز ديلينی، ملی ادبياتينی، عادت عنعنه لرينی و بير سوزله ملی مدنيتينی قورويوب و اونو انکيشاف ائتديردی٠ آذربايجان خالقی، سووئتلر بيرليينين داغيلماسی ايله يئنيدن اوز ملی دولتينی ياراتدی٠ ه۱٩۸٠- جی ايلين سونلاريندا سووئتلر بيرليينين بير چوخ ملی رسپوبليکالاريندا اولدوغو کيمی، قافقازدا دا ملی توققوشمالار باش وئردی. قورباچوون اطرافيندا بيرلشن يوکسک وظيفه لی ارمنی مشاورلرينين اشاره سی ايله ارمنی داشناکلاری داغليق قاراباغدا اوز ميندار نيتلريتی حياتا کئچيرمه يه باشلاديلار. قاراباغدا، آذربايجانليلار ياشايان کندلره باسقين ائديلدی. داغليق قاراباغ مختار ولايت سووئتی، قاراباغی ارمنستانا بيرلشديرمک حاقدا قرار قبول ائتدی. بونونلادا آذربايجان اراضی سی ارمنی اشغالينا معروض قالدی. ارمنی اردوسو روس اردوسونون يارديمی ايله قاراباغدا سلاحلی عمليات کئچيرمه يه باشلادی. آذربايجانين ملی اردسو اولماديغی اوچون، آذربايجاندا اوزونو مدافعه کونوللو سلاحلی دسته لر ياراندی. ارمنی اردوسو ايله آذربايجان سلاحی کونوللولر آراسيندا، آراسی کسيلمه ين دويوش باشلاندی٠ خانکندينده يئرلشن روس آلاينين بلاواسطه اشتراکی ايله خوجالی شهرينه گئجه باسقينی اولدو. دينج اهالينين بير حصه سی اسير دوشدو. بويوک بير حصه سی ايسه ان دهشتلی وحشيلکله قتله يئتيريلدی. خوجالی شهری تمامی ايله داغيديلدی٠ ه۱٩٩۳- جی ايله قدر اشغالچيليق محاربه سی آپاران ارمنيلر، آذربايجانين ٧ رايونونی اشغال ائتديلر٠ حيدرعلی يف حاکميته گلديکدن سونرا، اشغالچی ارمنی هجوملارينين قارشيسی آليندی. آتش کس اعلان ائديلدی. آتش کس رژيمی بو گونه قدر داوام ائدير باخمياراق کی، ارمنی اردوسو واخت آشيری آتش کس رژيمينی پوزور و آذربايجان اردوسو جواب آتش آچماغا مجبور اولور٠ آذربايجان خالقی اوزونون ايلک دموکراتيک دولتينين ۸۶- جی ايل دونومونو، دونيا مقياسيندا رسميته تانينميش مستقل آذربايجان دولتينين محکملنديی بير زاماندا قيد ائدير. آذربايجان خالقی، آذربايجان اراضی سينين بوتوولويونو برپا ائتمک عزمی ايله اوز ملی دولتينی محکملنديرير. اقتصادياتين انکيشاف ائتديرمه سی استقامتينده اوغورلو آدديملار آتير. اشغال اولونميش اراضی لرينی صلح يولی ايله آزاد ائديلمه سی ساحه سينده سياسی و ديپلماتيک امکانلاردان هر طرفلی استفاده ائدير. دونيا اجتماعيتی درک ائتمه يه باشلاميشدير کی ارمنی دولتی، اشغالچی دولت دير. آذربايجان ايسه اشغالا معروض قالميش و اراضی بوتوولويونو برپا ائتمک اوغروندا مبارزه آپاريير٠ شبهه يوخدور کی دونيا اجتماعيتی گئتديکجه آذربايجانين حاق ايشينی مدافعه ائده جک و ارمنی اشغالچيلاری آذربايجان اراضيسينی ترک ائتمه يه مجبور اولاجاقلار٠ آذربايجان دموکرات فرقه سی ه۲۶ مای ۲٠٠٤ (۶ خرداد ۱۳۸۳)٠
|