|
بهمن انقلابينين ۲۵- جی ايل دونومو مناسبتی ايله آذربايجـان دموکـرات فـرقـه سينين بياناتی |
|
ايران خالقلاری عصرلرله استقلال اوغروندا داخلی ارتجاع و خارجی متجاوزه قارشی بيرگه مبارزه آپارميش، بو يولدا ساييسيز - حسابسيز قربانلار وئرميشلر. ۱٩- جی عصرين ايکينجی ياريسی و ۲٠- جی عصر، ايران و ايران ياشايان خالقلاری اوچون گرگين مبارزه عصری اولموشدور. بو زامان ايران خارجی اولکه لرين، دقيق دئسک انگليس و روس تزارينين ياريم مستعمره سينه چئوريلميشدير. اکتبر انقلابی روسيه تزارينی ايرانين سياسی و اقتصادی صحنه سيندن چيخارتدی. بو انگليسلرين، سونرا ايسه آلمان فاشيزمينين ايراندا گئنيش فعاليتی اوچون الوئريشلی شرايط ياراتدی. انگليسين اشغالچی اردوسو رضاخانی حاکميته گه تيردی. بئله ليکله قاجار سولالسينين حاکميتينه سون قويولدو. ايکينجی دونيا محاربه سی سووئت اتفاقی، انگليس و آمريکانی هيتلريزمه قارشی محاربه ده بيرلشديردی. ايران غرب و شرق آراسيندا کورپو رولو اويناماق امکانينا مالک اولدو. عينی زاماندا آلمانلارين ايراندا گئنيش مقياسدا امنيتی فعاليتينه سون قويماق مقصدی ايله متفقلر يعنی سووئت اتفاقی، انگليس و آمريکا قوشونلاری ايرانا داخل اولدولار. بئش ايل اشغال دوورونده ايراندا نسبی دموکراتيا ياراندی. لاکين نفوذ دايره سينه چئوريلميش اولکه تام استقلال و دموکراتيک نظام ياراتماق امکانيندان محروم ائديلدی. بو ايللرده يالنيز آذربايجان و کوردستان خالقی عملی ايشه ال آتدی. بو ايکی ايالت ده دموکراتيک قورولوش، ملی زمينده ميدانا گلدی٠ ايکينجی دونيا محاربه سی سونا چاتدی و متفقلر ايراندان چيخمالی اولدولار. انگليس و آمريکا دولتلرينين بيرباشا يارديمی ايله شاه اردوسو آذربايجان و کوردستاندا حربی عملياتا باشلايب، هر ايکی خالقين الده ائتدييی دموکراتيک حقوق و آزادليقلاری آرادان آپاردی. لاکين بو حربی تجاوز خالقين سوسدورماسی اوچون سون تدبير دييلدی. آذربايجان و کوردستان ملی حرکاتلاری بوغولدوقدان اوچ ايل سونرا ايرانين ملی شخصيتی، دونيا مقياسدا وطن پرور کيمی تانينان دکتر محمد مصدق انگليس امپرياليزمينه «محاربه» اعلان ائتدی. ايران خالقلاری مصدقين چاغريشينا سس وئريب و اونلارين ملی ثروتی اولان نفت ملی لشديريلدی. انگليسلر و اونلارين آداملاری اولکه دن چيخاريلدی. لاکين بو استقلال اوغروندا مبارزه نين هئچده سونو دييلدی. انگليس و آمريکانين امنيت اداره لری مصدق حاکميتينی دئويريب، ۲۵ ايل محمدرضا ديکتاتوراسينی اولکه يه تحميل ائتديلر.لاکين بودا تاريخ سونو دييلدی٠ آزادليـغی سئون و خـارجی تجـاوزه قـارشی زنگـين دوويـوش تجـربه سينه ييه لـه نن ايـران خـالقـلاری۱۳۵٧- جی ايلين بهمن آييندا سلطنت اصول اداره سينی دئويرديلر. ديکتاتور محمدرضا، سرگردان يهودی لر کيمی غرب و شرق ياريم کوره سينده ديده رگين دوشدو. حاکيم طبقه و حاکيم دايره لر تاريخين بو عبرت درسينی ياددا ساخلاماليديرلار٠ ايران خالقلاری بوگونلر بهمن انقلابينين ۲۵ ايلليينی قيد ائديرلر. بو انقلاب حقيقی خالق انقلابی ائدی. ميليونلارلا انسان الی يالين شاه قوشونو و پليسی قارشيسيندا سينه گلدی. بئله ليکله اوز قهرمانليغينی و آزادليق سئورليينی بوتون دونيايا نمايش ائتديردی. اما تاسفلر اولسون کی، يئنه ده دموکراتيا و آزادليق يارانمادی. خالقين اراده سينه اساسلانان حاکميت، بير قورپ روحانی طرفيندن اله کئچيريليب، قانلی ديکتاتورا حاکيم اولدو. تاريخی تجربه نی ياددان چيخارانلار بويوک سهو ائديرلر٠ آزادليق اوغروندا غيرفعال مبارزه خرداد آيينين ايکيسی، ۱۳٧۶- جی ايلده فعال مبارزه يه چئوريلدی. ايران خالقلاری جمهور باشچيسی سئچکيسينده سياسی آزادليق و مدنيتلرين دانيشيغی شعاری ايله چيخيش ائدن نامزده سس وئردی. عينی زاماندا اهالينين سياسی صحنه يه چيخماسی اوچون شرايط ياراندی٠ بوگونکی ايران، نه شاه دوورونون حاکيم اولدوغو ديکتاتورلوق، نه ده انقلابدان سونراکی ديکتاتورلوق دوورو دييلدير. آلتی ايلدن آرتيقدير کی، آزادليق اوغروندا مبارزه خالق سوييه سيندن يوکسه له ره ک، حـاکميتين داخـلی مبارزه سی سـوييه سينه چـاتميشديـر. ايکی جنـاح، يـعنی کئـچمـيشـه قـايتـمـاق ايستـه ين (مـحـافـظـه کـار) جنـاح لا ايـره لييـه گـئـدن (اصلاحاتچی) جناح آراسيندا سياسی و قضايی مبارزه شدتله داوام ائدير. ٧- جی دوور مجلس سئچکيسی بو مبارزه نی ظاهرده کئچميشه منسوب اولان قوه لرين غلبه سی ايله سونا چاتسادا، عملده اصلاحات طرفداری اولان خالقلار و اونلارين اراده سينی افاده ائدن قوه لرين غلبه سيدير. خالق سئچکی منطقه لرينه گلمکله، اوز اراده سينی نمايش ائتديرير. او، ائله بير نامزدين سئچيلمه سيله ماراقلانير کی، همين نامزد اونون آرزو و ايستکلرينی، باشقا سوزله خالقين منافعينی تامين ائتسين. عکس تقديرده سس وئرمه ده اشتراک ائتمکدن بويون قاچيردير و يئنه ده غيرفعال مبارزه اصولونا ال آتير. غيرفعال مبارزه اصولو سياست صحنه سيندن اوزاقلاشماق دئمک دييل، بلکه حاکميتين مشروعيتينی سئوال آلتينا آپارماق اصولو دير. اسفند آيينين بيرينده کئچيريله جک سئچکی بو حقيقتين ثبوتا يئتيريلمه سينه بارز نمونه اولاجاقدير٠ آذربايجـان دموکـرات فـرقـه ياريم عصردن آرتيق آپارديغی مبارزه ده زنگين تجربه الده ائتميش و عموميتله اونو وئردييی پيش بينی و پروقنوز حقيقته اويغون اولموشدور. آزادليق سئون ايران خالقلاری مغلوب ائديلمزدير. اونلار بو مبارزه ده غالب گله جکلر٠ آذربايجـان دموکـرات فـرقـه سی بهمن آيی ۱۳۸۲ ايل
|