|
آذربايجان ملی مجلس موسسلرينين قرارلاری |
|
سه شنبه گونو، آبان آيينين ۲٩- دا (۱۳۲٤- جی ايل) آذربايجان خالقينين بويوک ملی کنگره سی، آقای پيشه وری نين عمومی اوضاع حاقيندا وئردييی معلوماتی مذاکره ائتديکدن سونرا آشاغيداکی قرارلاری اتفاق آراء ايله قبول ائدير؛ ه۱- بويوک دموکراتيک ملتلرين فداکارليغی نتيجه سينده ديکتاتورلوق، زورگولوق و نژاد اوستونلويو تبليغ ائدن قوه لرين ابدی اولاراق يئنيلدييی و بوتون ملتلره اوزنو اداره ائتمک، اوز مقدراتينا حاکم اولماق امکانی وجودا گلدييی حالدا، آذربايجان خالقی تمام معناسی ايله بير ملت کيمی آياغا قالخيب اوز طبيعی و قانونی حاقينا، اوز گوجو ايله مالک اولماق ايسته يير٠ ه۲- خالقيميز سوء تفاهم و تهمتلره يول وئرمه مک اوچون اوز مقدراتينی اله آلديغی حالدا، اولکه ميزين ايراندان آيريلماماغی نی اعلان ائدير و بوتون ايران خالقلاری ايله قارداشليغينی حفظ ائتمه يی اوزونه وظيفه بيلير٠ ه۳- ملی کنگره آزادليق دشمنلرينين افترا و تهمتلرينين اينديدن قاباغينی آلماق اوچون آچيق و آيدين صورتده آذربايجانين ايراندان آيريلماسی و يا اونون آيری مملکته الحاق انتشاراتينی جدی صورتده تکذيب ائدير٠ ه٤- آذربايجان خالقی مشروطه اصولونا صادق قاليب، قانون اساسينين دموکراتيک اصل لرينی اجرا ائتمه يه چاليشاجاقدير٠ ه۵- عمومی مشروطه قانونلارينی مراعات ائتمکله برابر آذربايجان خالقی اوزونون داخلی ايشلرينی اداره و ملی مختاريتينی تامين ائتمک اوچون قانون اساسيدان استفاده ائديب، انجمن ايالتی تشکيلاتينی بير قدر گئنيشلنديريب، اونا ملی مجلس آدی وئرير. ايران داخلينده ايرانين تماميت و استقلالينی هئچ وجه له خلل دار ائتمه دن، اوزونون ملی حکومتينی وجودا گه تيرير٠ ه۶- بويوک خالق ميتينگلرينين قرارينا گوره خالق کنگره سی آذربايجـان دموکـرات فـرقـه سينين رهبرلييی ايله، ملی مجلس و ولايت انجمنلری و ملی شورا مجلس انتخاباتينين فوريتله باشلانماسينی قرارا آلير٠ ه٧- هر بير ملت اوز مقدراتينا حاکم اولماسی او وقت امکانپذير اولا بيلر کی، او ملت ياشاديغی اولکه نی اداره ائتمک اوچون اساسی قانونلارا مالک اولا بيلسين. بيز چوخ ياخشی بيليريک کی، تهراندا تمرکز تاپميش مرتجعلر خالقيميزا بو اختياری وئرميه جکلر. بلکی اوزلرينين خائن اراده لرينی خالقا و مملکته تحميل ائتمک اوچون بيزيم قاباغيميزا انگل لرده چيخارتماقدان گوز يومماق ايسته مه يه جکلر. اونا گوره بويوک کنگره خالقيميمزين آرزو و طلباتينی عملی ائتمک اوچون جدی قدم گوتوروب، اوزونو مجلس موسئسلری اعلان ائدير. ملی مختاريتيميزی محکم پايه اوستونده قورماق اوچون ملی مجلس وجوده گه تيريير٠ ه۸- طبيعی ديرکی سياسی، ملی، اقتصادی و مدنی مختارييته مالک اولمادان ملی مختاريت بوش سوزدن عبارت اولوب، قالار. بو نقطه نظردن ملی مجلس موسسلری بير حکومت ياراتماسينی و مستقيماً داخلی ايشلريميزين بو حکومت واسطه سی ايله اداره ائديلمه سينی تاخيرسيز بير صورتده لازم گورور٠ ه٩- ملی مجلس انتخاباتی قورتاريب، ملی حکومت رسميت تاپان گونه دک، کنگره اوز نماينده لريندن ۳٩ نفرليک ملی هيات آدی ايله بير هيات انتخاب ائدير و قبول ائتدييی قرارلارين اجراسينی بو موقتی هيأته تاپشيريير٠ ه۱٠- بو هيأت ملی مجلس تشکيل تاپان گونه قدر آذربايجان خالقينين ملی ايشلرينی اداره ائده جک، ملی مجلس تشکيل اولان کيمی اونون وظيفه سی خاتمه تاپميش اولاجاقدير٠ ه۱۱- مرکزده و شهرستانلاردا باشلانان انتخاباتی تامين ائتمک و ملی هيأتين امنيتينی حفظ ائتمک اوچون ملی کنگره يه هر نوع تدبير گورمه يه گئنيش اختيار وئريلير٠ ه۱۲- ملی کنگره، دولت اداره لرينين باشيندا دووران مامورلاردان ملی هيأته تابع اولوب، اونون گوستريشلرينه و نظارتينه اطاعت ائتمه يی طلب ائدير و بونون خلافينا رفتار ائديب، اوزونو حاکم مطلق گوسترمک ايسته ين لرين تئزليکله دولت اداره لريندن اخراجينی لازم گورور٠ ه۱۳- ملی کنگره بوتون دولتی مدرسه لرده آذربايجان ديلينين، مجبوری صورتده تدريس ائديلمه سينی ملی هيأته تاپشيرير و بو ملی وظيفه نی انجام وئرمه يه مانع اولانلاری آذربايجان خالقينين دشمنی حساب ائديب، اونلارين ارتجاعی فکر و خائنانه حرکتلرينه مانع اولماق اوچون، جدی تدبيرلر گورسون٠ ه۱٤- کنگره پليس، ژاندارم و ارتش تشکيلاتينين ترکيبينی پوزماق فکرينده دييلدير. اونلار اوز رسمی لباس و درجه لرينی حفظ و وظيفه لرينی انجام وئرمکده داوام ائديرلر. لاکين اگر اونلاری اداره ائدنلردن، بيزيم ملی مختاريتيميزين عليه نه بير ايش باش وئرسه، ملی هيأته اختيار وئريلير کی، اونلارين خيانتلرينين قاباغينی آلماق اوچون جدی تدبيرلر گورسون٠
|