|
آذربايجان ملی حکومتينين اعلاميه سی |
|
آذربايجان ملی مجليسينين انتخاب ائتدييی آذربايجان ملی دولتی ايرانين استقلال و تماميتينی حفظ ائتمکله برابر، ايشه باشلاديغينی بو واسطه ايله بوتون خالقا اعلام ائدير؛ بو اعلاميه منتشر اولان گوندن (۲۱ آذر ۱۳۲٤) اعتباراً، مالکيت خصوصی محفوظ اولماق شرطی ايله بوتون آذربايجاندا اولان دولت اداره لری ته زه حاکميتين تحت اختيارينا کئچدييندن، عموم دولت مامورلارينا اوز وظيفه لرينی دوزگونلوک و صداقتله انجام وئرمه لری تاپشيريلير٠ ته زه دولتين امرلرينه اطاعت ائديب، اونون دستوری ايله رفتار ائدن کارمندلر اوچون مناسب ايش شرايطی وجودا گه تيريله جک، ايشله مکدن امتناع ائده نلر ايسه کمال احترام ايله ايسته ديکلری يئره گوندريله جکلر٠ آذربايجان ملی حکومتی خالقين سعادت و خوشبخت لييندن اوتری قورولدوغو اوچون، عموم خالقی فعاليته، دوزلويه، آسايش و امنيتی حفظ ائتمه يه، بير- بيری ايله قـارداشواری ياشـاماغا دعـوت ائدير٠ امينتی اخلال ائدن و خالقين مال، جان، ناموس و حيثيتينه تجاوز ائله ينلر، همچنين دولت مالينا خيانت الی اوزاديب دولت اداره لريندن سوء استفاده ائدنلر و يا دولت اداره لرينده خرابکارليق، مسامحه و اوز وظيفه سينده کوتاهليق ائتمک کيمی خائنانه تشبثلر بروزه وئرنلر ايسه خالقين دشمنی حساب اولونوب، ملت و دولت يانيندا نفرت و انزجار قازانماقدان علاوه، قانونی محکمه واسطه سی ايله مجازات ائديله جکلر٠ هاميدان خالقا و اولکه يه خدمت و آذربايجانين گه له جه يی يولوندا جديت گوزله نير. دولت ايسه اونون شرايطينی وجودا گتيرمه يه چاليشاجاقدير٠ آذربايجان ملی وزيرلر هيأتی عين زاماندا آذربايجاندا ماموريتلری اولان خارجی دولتلرين ديپلوماسی نماينده لرينه اطلاع وئرير کی، کما فی السابق اونلارين بين الملل قانونلار شرايطينده اولان حق و اختيارلاری کمال دقت و احترام ايله مراعات اولوناجاقدير. همچنين دموکراتيک دولتلرين اتباع اينين آسايش و امنيتينی حفظ ائتمک يولوندا ملی دولت هئچ بير فداکارليقدان خوددارليق ائتمه يه جکدير. بوگوندن اعتباراً دولته متعلق اولان منقول، غير منقول اموال، همچنين نقد و جنس و اعتبار ملی، دولت اختيارينا کئچدييندن، اونلارين ساخلاماغينا موظف اولان دولت مامورلاری، کئچميشده وئرديکلری تعهد و قبول ائتديکلری مسئوليت اوزره، اونلاری حفظ و حراست ائتمه يه مجبوردورلار. بو اموالی حيف و ميل ائدنلر آغير جزالارلا مجازات گوره جکلر٠ آرتيق آذربايجان ملی حکومتی تحقق تاپميش، خالقين اراده سی ايله داخلی ملی دولتيميز وجودا گه ليب، رسمی صورتده خالقيميزين آرزو و آمالينی اجرا ائتمه يه باشلاميشدير. خالق ايسه اوز ملی حکومتينه، وار قوه سی ايله مساعدت گوستريب اونون فعاليتی اوچون مناسب شرايط وجودا گه تيرمه ليدير٠ يوخاريدا قيد ائديلدييی کيمی دولت وار قوه سی ايله امنيتی حفظ ائتمه يه چاليشير. اونا گوره خالق اوچون نگران اولماغا هئچ بير دليل يوخدور. هر کس اوز ايشينه مشغول اولمالی، اوز ايسته دييی کيمی ياشاماليدير. بازار باغلاماق، مدرسه لری تعطيل ائديب، وحشت و اضطراب ياراتماغين معناسی يوخدور. حکومت اوز برنامه سينی خالقين احتياجاتی اوزه رينده قورموشدور. اونا گوره خالقی ناراحت ائدن حادثه لره يول وئرمييه جکدير. تصادفی حادثه لره ايسه چوخ تئز بير زاماندا خاتمه وئريله جک. ماجراجولار، آسايشی اخلال ائدنلر صالح محکمه طرفيندن محاکمه و شديد بير صورتده مجازات اولوناجاقلار. هئچ بير پيس اتفاق دوشميه جکدير. هئچ کسين حقوقونا تعرض اولمياجاقدير. ملی حکومت نظمييه اداره سينی ته زه قوه لر، وسيع اختيارات ايله گوجلنديرميشدير. هرج و مرج و ناامنلييه آرتيق ميدان وئريلمييه جکدير. مخصوصاً مدرسه لريميز همان سابق پروگراملارينی تعقيب ائتمه لی محصللريميز وار قوه لری ايله امتحانلارا حاضرلاشماليديرلار٠ کندلرده و شهرستانلاردا ايسه جدی صورتده ايشه باشلانيب عادی حال وجودا گه له جک و دولت مامورلاری، فدايی لرين و يا غير مسئول اشخاصين دخالتی اولمادان اوز وظيفه لرينی انجام وئرمه يه قادر اولاجاقلار. فدايی دسته لری انتظام آلتينا آلينيب معين مرکزه تابع اولاجاق، بو واسطه ايله هر بير سوء حادثه احتمالينين قاباغی آليناجاقدير٠ گئدين چاليشين، آسوده اولون ملتيميزين گه له جه يی و سعادتينی تامين ائتمک اوچون قبول ائتدييميز وظيفه نی صداقت و ايمانلا انجام وئرين. دولت عموم هموطنلردن بونو طلب ائدير٠
|