|
آذربايجان ملی حکومتينين برنامه سی |
|
آذربايجان ملی کابينه سی، آذربايجان خالقينين ايللر بويو آرزو ائتدييی ملی مختاريتينی عملاً وجودا گه تيرمک و بو واسطه ايله آذربايجان خالقينين ملی احتياجلارينی رفع ائديب، اونو مترقی و تکامله سوق ائتمک اوچون آشاغيداکی وظايفی اوزونون ياخين هدفی و برنامه سی قرار وئرير؛ ه۱- ملی مختاريتيميزی دونيايا تانيتماق، اونون داوام و بقاسينی تامين ائتمک اوچون جدی تدبيرلر گوروب، صلاحيتدار مقامات ايله مذاکره يه گيريشمک، ايرانين استقلال و تماميتينی خلل دار ائتمه دن ملی دولتيميزی دموکـراتيک اساسلار اوزره قـورماق و بو يولـدا قاباغا چيخابيـلن مشکـلاتی رفع ائتمـک٠ ه۲- ملی مختاريتيميزی محکم اساسلار اوزره قوروب، اونو خالقا ياخينلاشديرماق مقصدی ايله چوخ تئز بير صورتده ولايت انجمنلرينين انتخاباتينا باشلاماق و يئرلی اداره لرين نظارتينی اونلارين اختيارينا قويماق٠ ه۳- شهرلريميزين عمران و آبادليغی اوچون بلاتاخير شهر انجمنلرينی، دموکراتيک اساسلار اوزره انتخاب ائديب، اونلارين ايشلرينی دوزگون و صحيح بير صورتده جريانا سالماق٠ ه٤- يئرلرده معتمد آزاديخواه آداملاردان، فرماندار و بخشدارلار انتخاب ائديب، اونلارين واسطه سی ايله کئچميش ظالمانه حرکتلر و خالقی تحقير ائديجی عمللرين قاباغينی آليب، بوتون اولکه ده امنيت و آسايشی تامين ائتمک٠ ه۵- ژاندارم و پليس اداره لرينی خائن و خالقی ازيب فلاکته سوق ائدن اشخاصين اليندن چيخاريب، آزاديخواه و ميهن پرست اشخاصا تاپشيرماق و اونلارين ايشلرينی خالقين آرزو و احتياجاتينا متناسب بير حالا سالماق٠ ه۶- ماليات قانونلارينی نظردن کئچيرمک و ماليه اداره سينين دخل و خرجينی تفتيش ائتديکدن سونرا، چوخ تئز بير صورتده ملی بودجه لايحه سينی ملی مجلسه تقديم ائتمک. عموميتله مالی سياستين گه لير و مخارج اساسينی مملکتين ترقی و تکاملی اوزرينده قرارلاشديرماق٠ ه٧- مختاريتيميزی، ملی مجلسيميزی و ملی دولتيميزی قورماق و اونون گه له جه ينی تامين ائتمک اوچون کندلرده و شهرلرده وجوده گلن فدايی دسته لرينی بير مرکز اطرافيندا تمرکز وئرمک، ملی خالق قوشونو وجودا گه تيرمک و بو قوشونون تسليحات و تنظيماتينی معاصر حالا سالماق مقصدی ايله جدی تدبيرلر گورمک٠ ه۸- فرهنگ و معارف ساحه سينده دولتيميزين قاباغيندا ايکی بويوک مسئله دورور. بيرنجيسی اوز ملی ديليميزی بوتون مدرسه لرده رسمی اولاراق قبول و اجرا ائتمک، ايکينجيسی ايسه عموميتله سوادسيزليغا قارشی مبارزه آپارماق، مجانی و اجباری تحصيلی عملی يولونا قويماق. بونلارين هاميسيندان چوخ، ملی حکومتيميزين عالی تحصيل مسئله سينه اهميت وئريب، ملی دارالفنونوموزون (دانشگاه) اساسينی قورماغا چاليشماليدير٠ ه٩- تجارت و اقتصاد ساحه سينده ملی حکومتيميز بيرينجی نوبه ده ملی صنايع ميزه اهميت وئريب، موجود کارخانالاری دوزگون يولونا قوياجاق. ايکينجی نوبه ده يئنی کارخانالار آچماقلا، مملکتين صنايعينه اولان احتياجاتينی تامين ائده جکدير. تجارت ساحه سينده دولتيميز آذربايجانين تجارت مرکزی اولا بيلمه سی اوچون تدبيرلر گوره جک و يوللار آراياجاقدير٠ ه۱٠- يوللارين تعمير و احداثی، پست و تلگراف و تلفن کيمی ارتباط وسايطينين گئنيشلنديريب، معاصر حالا سالينماسی حکومتيميزين اساسی وظيفه لريندن دير٠ ه۱۱- کندلی ايله اربابلار آراسيندا توليد اولان اختلافاتی رفع ائتمک اوچون متقابل رضايت شرطی ايله، جدی قانون لايحه سی تنظيم ائديب، بو يولی ايله کندلی و ارباب مسئله سينی حل و تصويب ائله مک٠ ه۱۲- کندلرده و شهرلرده گوندن - گونه آرتماقدا اولان ايشسيزليغين قارشيسينی آلماق اوچون خالصه تورپاقلارينی فوريتله زارع لر آراسيندا تقسيم ائتمک. همچنين آذربايجانی ترک ائديب اونون خارجينده ملی مختاريتيميز عليه نه تبليغات آپارانلاريندا يئرلرينی ضبط ائديب کندليلرين اختيارينا قويماق ايله يئرسيز کندليلر آياقلانديريلماليدير. بوندان علاوه خالقيميزين اکثريتينی تشکيل ائدن کندليلر اولدوغو اوچون گه له جکده بانک کشاورزينی ائله بير صورتده قووتلنديرمک لازمدير کی، ايلييه بيلسين کندلييه اعتبار وئرمکله يئر مسئله سينی حل ائتسين و اربابلار اوز ميل و رغبتلری ايله يئرلری کندليلره عادلانه قيمته ساتا بيلسينلر٠ ه۱۳- ايشسيزليکله جدی مبارزه ائتمک اوچون جدی تدبيرلر گورمک، ال صنايعی، يول ايشلری، کارخانالار تاسيسی، فلاحت و تجارتين آرتماسی وسيله لريندن جدی صورتده استفاده ائتمه يی لازم گورور٠ ه۱٤- کارگر و زحمتکشين معيشتينی دوزگون يولا قويماق اوچون ايش و زحمت قانونو لايحه سينی تهيه ائديب مجلسه تقديم ائتمه لی و عين زاماندا ايشچيلرين بيمه ائديلمه سينی اجباری ائتمک اوچون تدبيرلر گورمه ليدير٠ ه۱۵- صحييه ايشينه توجه ائديب بيرينجی نوبه ده عمومی و مسری خسته ليکلرين قاباغينين آلينماسی و مخصوصا کندلرده و آشاغی طبقه يه حکيم و داوا يئتيرملکه خالقين بهداشتينی تامين ائتمه ليدير٠ ه۱۶- ملی شورا مجلسی طرفيندن بو آنا قدر وضع اولونموش قانونلاری، آذربايجان خالقينين حياتينا و ملی مختاريتينه مناسب بير صورتده اصلاح ائديب ته زه مفيد لايحه لر پيشنهاد ائتمک٠ ه۱٧- خصوصی مالکيت حاقيندا آذربايجان ملی حکومتی، مملکتين بوتون ساحه لری اوچون خصوصی مالکيتی قبول ائديب، مملکتين و خالق اقتصادياتينين ترقی سينه و خالقين رفاه حالينا سبب اولان هر جور خصوصی اقداماتا کومک ائده جکدير٠ ه۱۸- آذربايجان ملی حکومتی، اولکه ده ياشايان عموم اهالينين وجدان و عقيده آزادليغينا احترام ائده جکدير٠ ه۱٩- آذربايجان ملی حکومتی، آذربايجانليلارلا بيرليکده آذربايجاندا ياشايان بوتون هموطنلری خصوصی ايله کوردلر و باشقالارينی حقوق و قانون مقابلينده مساوی حساب ائدير٠ ه۲٠- آذربايجان ملی حکومتی، مرکزی ايران حاکميتينی تانيماقلا برابر بو حکومتين آذربايجانين مختاريتينه مخالف گلمه ين، آذربايجان خالقينين موسئسان مجلسی و آذربايجان مجلسينين مراجعتنامه و قرارلاريندان قيد اولونان ملی حقوق طلبلرينه ضد اولمايان تدبيرلرين حياتا کئچيره جک دير٠ برنامه نين اطرافيندا مفصل صورتده بحث ائديکدن سونرا رای آلينيب، آذربايجان ملی حکومتينين برنامه سی اتفاق آراء ايله تصويب اولدو٠
|