|
http://www.azbiltop -gis.blogfa. com/ اولو تانرينين آدييلا منفي موباريزه قاليبينده « مهر آيينين بيرينده درس كيلاسلارينا گئتمه مك» اوزره آذربايجانلي بيلييوردلولار توپلومونون (Azbiltop) بيانيهسي بير حالدا مدرسهلر، بيلييوردلار و اؤيرتيم اوجاقلارينين آچيليشينا ياخينلاشيريق كي، تأسوفله يئنه ده ايراندا ياشايان ميلتلر و قوملارين اسكي آرزيسينين -يعني اؤز آنا ديلينده درس اوخوماق آرزيسي- الده ائديلمهمهسينه تانيقيق(شاهيديك). اوشاقلار، يئنييئتمهلر و گنجلر و بير سؤزده غيرفارس ميلتلر و قوملارين اورگي پاك معصوملاري بير حالدا يئني درس اوخوما ايلينه و علم و بيلگي و جهالتدن قورتولوش مأواسينا قدم قوياجاقلار كي، يوكسك بيليمسل درجهلره چاتماغا باخماياراق، اؤز ديلي، كيمليگي، تاريخي و بير سؤزله اؤز ميلي و قومي وارليغينا بيلگيسيز قاليب و قالاجاقلار؛ بير جهالت و بيلگيسيزليك كي، فرهنگي آپارتايد و شوونيسم قاليبينده اولان مسموم تفكورلر و سياستلر اونون باعيث و بانيسيدير.آذربايجانلي و تورك اوشاقلار اؤز چئشيتداشلارينين(همنوعلارينين) قيراغيندا بير حالدا بيليم اوجاقلارينا گئتمگه حاضيرلاشيرلار كي، -آنا ديلينده درس اوخوماق اوچون لازيم اولان ياتاقلار(بسترلر) و ايمكانلاري ياراتماق اوزره- مسئوللار و هابئله مجليس نومايندهلرينين وعدهلريني ايچي بوش و پوچ گؤرورلر. بو مسئله ايجتيماعي-سياسي مسئلهلردن قيراق و پانتركيسم و پانعربيسم كيمي انديشهلر اولماسي اوزره وورولان انگلردن قيراق و هابئله بو ايستكلرين ميلي امنيته -او امنيت كي، خاص بير اقليتين منفعتلري اساسيندا تعريفلنير- تهديدلي اولماسي شوعاريندان قيراق، ائورنسل(جهاني) اعلاميهلر و كونوانسيونلار اؤزلليكله بشر حوقوقو و ديل حوقوقو و حتي ايران ايسلامسل جومهوريسينين اؤز آنا ياساسينين نقضينين عيني و باريز گؤستريجيسيدير. بيلگين و آييق ويجدانلار؛ بئلنچي دورومدا نه ائتمك گرك؟! اعتيراض سسي قووزانماماليديرمي؟! بئلنچي دورومدا بوتون يؤنلري اؤزلليكله اؤلكه و آذربايجان بؤلگهسينين حساس دوروم و شراييطيني نظرده آلماقلا «منفي موباريزه» قاليبينده مدني موباريزه ائتمك اولار كي، بيزجه «مهر آيينين بيرينده(يئني درس اوخوما ايلينين بيرينجي گونو) درس كيلاسلارينا گئتمهمك» ان ياخجي، موساليمتلي و عوموم سئون يوللارداندير. بلكه ده ميلتلر و قوملارين اوشاقلارينين سسي، بيلگين و آييق ويجدانلاري او جوملهده آيدين فيكيرلر، سياست آداملاري و هابئله مركزده اوتوران قودرت اهليني واقعيتلري باشا دوشمگه يؤنلهده بيليب، و هابئله اوشاقلاريميزين آنا ديليميزده درس اوخماق اوچون لازيم اولان ايمكانلاري ياراتماق اوزره اويغون سياستلر نظرده آلينماغا مجبور ائده بيلسين. اومودوموز وار كي، مسئوللار و مجليس نومايندهلري آذربايجان توركجهسينين رسميت تاپماسي و هابئله آذربايجان توركجهسينين ديل و ادبياتي فرهنگستانينين قورولماسي اوچون اؤز وعدهلرينين تحقق تاپماسيندا لازيم اولان ايقداملاري ائديب و آذربايجان ميلتينين اؤنونده اؤز وظيفهلرينه عمل ائتسينلر. "آذربايجانلي بيلييوردلولار توپلومو(Azbiltop)" آذربايجان ميلتينين موختليف قيشلري اؤزلليكله اؤيرنجيلر، اوخوجولار، اؤيرتمنلر، اوستادلار و هابئله اؤز اويهلر و يانداشلاريندان ايستيير كي، مهر آيينين بيرينده ، اؤلكهنين فرهنگي فضاسينا حاكيم اولان شوونيستي سياستلره و هابئله ديل و كولتورل حاقلاريميزين وئريلمهمهسينه اعتيراض اولاراق، درس كيلاسلاريندا شيركت ائتمهسينلر. بو اوزدن ده، باشقا عزيزلرين اينانج و نيتلرينه احتيرام ائتمكله بئله اعلام ائديريك كي، اؤلكه و هابئله آذربايجان بؤلگهسينين فضاسي -اؤزلليكله بو ايلكي خورداد آيينين اولايلاريندان سونرا- باشقا حركتلره اؤزلليكله خياباني اعتيراضلار و ييغينجاقلارا اويغون دئييل و بئلنچي ايقداملار آذربايجانين داغ گؤرموش و مظلوم ميلتينه آيري ناگوار نتيجهلر يارادا بيلر. آذربايجانلي بيلييوردلولار توپلومو 20/6/1385
|