دوستاقلانان ميللي فعاللاريميزي مودافعه ائتمك طرزينه بير اينتيقادي باخيش.
آذربايجان ميللي حركتي گون- گوندن داها گوجلو ايرلي لمكده و يولونا داوام ائتمك ده دير. بو يولدا جانلاريندان و ماللاريندان كئچن لرين و هزينه وئرن لرين سايي گونو گوندن آرتماقدادير. آذربايجانين هر هانسي بير شهر و حتي كند لرينده توتوقلانمالار و دوستاقلانمالاري گؤرمك اولور.
بو آرادا ميللي حركت و اينسان حاقلاري چاليشقانلارينين اساس گؤره و لريندن بيري همن بو دوستاقلانان ، ايشكنجه لره و چتينليك لره معروض قالان سيلاحداشلاريميزي هر طرفلي دستكله مك و اونلارين سسيني دونيايا چاتديرماق دير.
بو حاقدا عزيز چاليشقانلاريميزين بير چوخسونون چالليشمالاريني گؤرمك اولور. اؤزلليكله كئچن بير ايلده ايگيد و دونمز ميللتچي ، سايين عباس بي ليسانينين دوروموندان دانيشيب،اونو دستكله ييب، سسيني اينسان حاقلاري اورقانلارينا چاتديرماغا چاليشانلار چوخ اولوبلار.
عباس ليساني بير چوخ باشقا ميللت چي چاليشقانلار كيمي ، فارس شوونيزمي طرفيندن حبس اولونوب و آغير ايشكجه لره معروض قاليب ،بئله ليكله اونا و عائله سينه هرجوره مادي و معنوي دستك اولماق بيزيم بو عزيزلريميزه گؤره بيله جك ان آز يارديملاريميزدان اولماليدير.
بو يازيني يازماقدا سؤزوم عباس بي ليساني ني مودافيعه ائدنلره يوخ، عباس بيي مودافيعه ائديب باشقا دوستاقدا اولان و ايشكنجه لره معروض قالان ميللت چيلري اونودانلارا دير.
ميللي حركت ايچره چوخلو توتوقلانان و دوستاقلانان حركت چي لريميز وار كي توتوقلانيرلار بير حالدا كي مئديالاردا اونلاردان هئچ بير آد چكيلمير.
ميثال اوچون خزر و بايكال آدلي ايكي گنج ميللتچيميز دوستاق چكيب ده بوراخيلديلار، آما هئچ يئرده اونلارين آدي چكيلمه دي
عزيز پورولي آدلي قهرمان 75-اينجي ايلدن آرديجيل توتوقلانير ،بوراجان اوندان حاكمييت بير كلمه بئله آلابيلمه ييب. آنجاق اوندان خبر يازاندا يالنيز يازيلير عزيز پورولي ده توتولدو و يا بوراخيلاركن يازيليز بوراخيلدي.
اردبيل ده ،قاراداغدا، سردري ده و تبريزده توتوقلانان دوستلاريميز دا هابئله.
حؤرمتلي حركت چاليشقاني چنگيز بخت آور جنابلاري هئچ بير ندني اولمادان توتوقلانديقدان سونرا ساده جه بير جومله توتوقلانماسينين خبري گئدير و كيمسه بو ايشچي قارداشيميزين و اونون عائله سينين دوروموندان يازمير، ماراقلانمير و ...
نييه؟ سبب نه دير؟ ميللتچيلرين آراسيندا نييه فرق قويوروق؟ عباس ليساني ايله عزيزپورولي نين فرقي نه دير آذربايجانا؟ هر ايكيسي آذربايجان اوغلودور،هر ايكيسي چتين شرايطه باخماياراق موباريزه ني داوام ائديرلر.هر ايكيسي دؤنمز ديرلر.
اصلينده عباس بي ليساني ني مودافيعه ائدنلري نئچه يئره بؤلمك اولار:
1- بيرينجي عباس ليسانين نين چئوره سينده اولان و ياخين دوستلاريندان ساييلان ميللتچيلردير كي هئچ نه اوممادان عباس بي و اونون عايله سينه يارديمجي اولوب، اونو مدافيعه ائديب، دورومون اينسان حاقلاري اورقانلارينا چاتديريرلار. و يا اونو ياخيندان تانيماسالاردا ذاتا اينساني و ميللي گؤرولري اولاراق عباس بيين سسيني دونيايا چاتديرماغا چاليشيرلار. بو عزيزلريميزين ايشلري سون درجه ده ديرليدير.
2- ايكينجي او قروپ و يا پارتيالار كي عباس بيي رئكلام ائلمكله اونو ييه لنمك و اؤز پارتيالاريندان گؤسترمك آماجينداديرلار. و داها دوغروسو اونلارين آماجي بو ايشدن ، شخصي و سياسي منفعت لره ال تاپماق دير.
3- اوچونجو قروپ بير سيرا جسارتسيز اينسانلار اولوبلار كي اؤز جسارت بوشلوقلاريني گيزلتمك و دولدورماق اوچون عباس بيين جسارتيندن و ايگيدلييندن دانيشيرلار و يا بير سيرا شخصيت پرست اينسانلار كي هر زامان بيريسي نين حاقيندا مداح ليق ائله مه يه حاضير ديرلار.
4- دوردونجو قروپ ايسه او قروپ و يا پارتييالارديرلار كي سيرادان قالماسينلار دييه عباس بي ليساني ني مدافيعه ائديرلر.
بو اوميديله بو يازيني يازديم كي ميللي حركت ايچره صداقتلي، سارسيلماز و يئنيلمز ميللتچيلريميزي ،مدافيعه ائتمكده هئچ بيرينده فرق بيلمه دن ، ساده جه اينسانيت و گؤره و اوزريندن بو عزيزلريميزين اوزلري اوچون اونلاري مدافيعه ائدك.
ايشيقلي گؤنلر آرزوسويلا
خاتين موغانلي